சரியான கிரெடிட் கார்டை தேர்வு செய்வது எப்படி?

பொதுவாக கிரெடிட் கார்டை தேர்வு செய்யும் போது, ஒருவரின் செலவு பழக்கத்திற்கு ஏற்ப கார்டு அமைந்துள்ளதா என்பதை முதலில் கவனிக்க வேண்டும்.

ஒவ்வொரு கார்டுக்கும் இடையே பலன்கள் மாறுபடக்கூடும். ஆனால், செலவு பழக்கத்திற்கு பொருத்தமாக இல்லாத நிலையில், கார்டு பயன்பாடு எதிர்பார்த்த பலனை அளிக்காமல் போகலாம்.

உதாரணமாக, ஒரு சில கார்டுகள் ரெஸ்டாரண்ட்களில் செலவிடும் போது அதிக பலன் அளிக்கலாம். வேறு சில கார்டுகள் எரிபொருள் பயன்பாட்டிற்கு பலன் அளிக்கலாம்.

எனவே, பயனாளிகள் தங்களது செலவு பழக்கத்தை கவனித்து அதற்கேற்ற கார்டை தேர்வு செய்ய வேண்டும்.

ஒரு சில கார்டுகள் கூடுதல் பலன் அளித்தாலும், அதற்கேற்ப ஆண்டு கட்டணமும் அதிகமாக இருக்கலாம். சலுகைகளும், கட்டணமும் பொருத்தமாக இருக்கிறதா என பார்க்க வேண்டும்.

கிரெடிட் கார்டு பயன்பாட்டில் வட்டி விகிதம் முக்கியமானது. பில் தொகையை தாமதமாக செலுத்தும் போது வட்டி வசூலிக்கப்படும்.

இந்த வட்டி விகிதத்தை கவனிக்காமல், சலுகைகள் அடிப்படையில் மட்டும் கார்டை தேர்வு செய்வது தவறாக அமைந்து விடும்.

எல்லா கார்டுகளும் நிபந்தனைகள், விதிமுறைகளை கொண்டிருக்கும். பொடி எழுத்துக்களில் இடம்பெறும் இவற்றை கவனமாக படித்துப்பார்த்து கார்டின் தன்மையை புரிந்து கொள்ள வேண்டும்.

குறைந்த பட்ச தொகை, சலுகை காலம், அபராதம் உள்ளிட்ட அம்சங்களை கவனிக்க வேண்டும்.

ஒரே நேரத்தில் ஒன்றுக்கும் மேற்பட்ட கார்டுகளுக்கு விண்ணப்பம் செய்வதையும் தவிர்க்க வேண்டும். கார்டு தொடர்பான பாதுகாப்பு அம்சங்களையும் அறிந்திருக்க வேண்டும்.